“As palabras sempre serán un bálsamo reparador”

Cando un ten tan clara a súa vocación cústalle deixar de facelo. Ese é o caso de Mercedes Garrote, a profesora do Colegio Vigo que capitaneou á clase de 4º da ESO do IES Rafael Dieste ata o seu éxito na Categoría Literaria dos premios de Escola en Camiño. O curioso? Pois que Mercedes está xa xubilada, pero non pode deixar de participar no certame e sobre todo de acompañar aos seus (ex)alumnos.

Deste xeito, Valeria Ortiz Arias (con “Camiño esquecido”), Leda Tinaquero Vizoso (con “O camiño da sombra”) e Daniel Rey Cousillas (con “Os Penitentes) foron o trío gañador do premio.

Os tres participantes utilizaron distintos estilos literarios para expresar os sentimentos e reflexións internas dos peregrinos en pleno Camiño cara a Catedral. 

En O Camiño da Sombra, que acompaña estas liñas, Leda nos traslada a una historia case de terror, que mantivo ao xurado no borde do seu asento mentres devoraban un a un cada parágrafo deste relato onde, espertando de madrugada no seu albergue, a rapaza protagonista atopa cun visitante paranormal.

Tamén en formato relato, o traballo de Daniel conta a historia de boca de Miguelillo, quen coñeceu no pasado a un dos penitentes que recorren o Camiño a Compostela en busca de perdón divino. O conto remata en alto, cun disparo, sen resolver de todo que ocorre cando un peregrino pon a súa alma nos brazos de Santiago.

E por último, desta vez en forma de poesía, Valeria lévanos por un Casmiño Esquecido, onde, entre rimas, navegas polas dúbidas que asaltan a cabeza dos peregrinos cando non saben se serán capaces de enfrentarse a todo o que supón o Camiño a Compostela, coas súas inclemencias, pero sobre todo coas súas marabillas.

E así remata a poesía a nosa gañadora: 

Debemos atopar os camiños que non fan crer, que nos fan crecer.

Estamos seguros de que todos eles seguirán medrando, da man dos seus mestres e da literatura. Noraboa aos tres!